”WUNGGULI LO TAA MOHUTATO”

To lipu tuwau woluo taa mohutato, mohutataa duluo. Taa mohuhula olongia lo lipu bo misikini, wau ta wali-yali taa kaya da’a to lipu boito.

To huilio tuwau odelo dia sana-sanangi ma’o hilaalio li olongia boito. Lapata’o laalaahulo tio ohila mopasiali wau diila pake-pake lo pakeeangi lo olongia tio, bi kakaaini lo’u biasa. To’u maa na’o-na’o boito maa lodudunggaaya taa olongia botia wolo taa wopatota taa motota’oa.

Maa lohintu taa olongia botia olo taa wopatota boito, “Ei, maa ode utoonu ti mongoli wopatota botie?” Dabo diila otaawa li mongolio taa he mohintu botia olongia lo lipu. Bolo ualo taa ngota ma’o li mongolio, ”Ami botia hi pololohe bele lo taa kaya. To’utoonu ma’o bele lo taa kaya to lipu botia?”

Bolo tameta’o li olongia, “Teeto mota.”

“Nte potunua mai olami.”

“Yi, diila mowali na’oolo, sababu o’apula ngohuntualo teeto wau modengeto.”

“Ah, diila mongola, ami hi deloa u popo’a apula, deendengi.” Lapata’o maa hi na’oa ti mongolio limolota ode bele lo taa kaya boito. Leidungga mota ode bele boito laato maa lotiwalungaa to walungo bele boito ti mongolio.

Taa motolidile hi bisalawa. Bolo ualo taa bua ma’o, “Kaka, yi’o botii kaya, dabo bilehe’u mai diaalu taa mopo’uda’a, meaalo mohurumati olemu. Ti kakamu boito mosikini he pohuuhurumatia lo tau. Debo mopiohu amu u mowali olongia.”

Lo’ia lo dilelio boito diipo tilametalio lo taa lola’i, maa lolo’ia pooli dile taa bua ualio, “Diila mowali bo peedianto tio? Wonu maa yilate tio tantu de yi’o taa pogantilio olio, maa mowali olongia yi’o, sababu yi’o wutatio.”

Bolo ua ma’o lo dile taa lola’i, “Oo’o.”

Lapata’o ti mongolio maa leituluhu. Maa pilopoduloti mongolio taa tuutuluhee boito, lapata’o ti mongolio limolota maa lobotulaa mola wau ma’o biloonggari li mongolio hulawa u tahu-tahu ngo’aa’amila. Ilodeloa mai lo hulawa boito bola meela.

Maa hi pohiintua ti mongolio limolota botia woloolo taayade lo hulawa boito to woolota li mongolio. Bolo ua ma’o lo taa olongia, ”Tapilapo ma’o to ali hulawa botie! Wonu diila lolohu lo taa ohu’uolio de gaambangi muli hamaanto. Wau bola meela boti puhutunto tuoto, polihutonto to tonuli’itanto alihu ataawanto taa tihu-tihuto lo bola meela donggo ngotaamania.”

To’u maa yilapata’o lolapi mola hulawa boito to ali, maa lohualingo ti mongolio. Looloombulio mola maa he lolohulio hulawalio lo taa kaya boito, sababu maa ilotaawalio u hulwa tahu-tahu boito, maa biloonggari lo tau wau maa tilaa’o li mongolio. Maa laato mola pilodulohulio to taa olongia hale lo’u tio pilota’oa boito wau taa buaalio maa deedelo peedi pomeedilio olo taa olongia odelo u maa ilosaatujua li mongolio motolidile ohui. Ilodunggaa ma’o li mongolio taa olongia he molihu, wau kopilio maa buhu-buhuto dutu-dutu to tudu lo meja. Lapata’o taa bua boito maa lotihulo’o to tili lo meja u okopi boito wau laato tiluangalio peedi kopi boito. 

To’u taa olongia lonto polihua mai iloontongalio taa bua yipahio botia maa hulo-hulo’aa to tili lo kopilio boito. Bo laato tilumuotopo taa olongia botia ode hualilio, wau maa pilohilelio mai kopilio ode huali. Bo tila’ubelio ma’o kopi boito, sababu ootawalio maa opeedi. Lapata’o taa olongia maa yilumualai maa mai lotihulo’aa pe’e-pe’eenta wolo wutatio wau yipahio boito. Lapata’o muli maa lohile kopi ngomanggo tio. Maa heheerani yipahio botia, sababu kopi opeedi diila ilorasaalio.

Maa lohintu taa olongia botia to meembihu u ilona’oa mai lo wutataa wolo yipahee botia, ”Maa hinta wolo u ilona’oamu mai donggo dumodupaa odie?” Bolo ualo yipahee botia, ”Amiaatia pilota’oa hulawa ohui. Pohileelamiaatia pe’ilolohunto taa maa yilota’o boito.”

”Oo’o, de maa pe’ilolohu’u mai, pe’iwa’upo’u wau pe’ideloo’u mai odia mai. Dabo modaantiapo ito. Wonu motapu mai hulawa boito motaayade duluo ito.” Yi maa silatujua li mongolio hihile lo taa olongia boito.

Lapata’o maa pile’ilolohu lo taa olongia taa lota’o hulawa boito wau tuotio tihu-tihutaa lo bola meela tinuli’ita li mongolio. Lapata’o maa ilodunggaa lo taa he mololohee boito to paatali woluo taa tihu-tihutaa lo bola meela tinuli’italio he mopotaalia. Maa yila’upio wau maa deloolio ode taa olongia, bo dia mohuto tio sababu ualio ti mongolio ngo’aa’amila limolota.

Lapata’o maa ma’o yilolohio tamaniilio bo toulota taa yilotapulio. Maa dilelolio lo taa ilahula lo taa olongia boito ti mongolio wopatota mota popotaaluolio to taa olongia lo lipu boitu.

To’u maa leidungga mota ode talu lo taa olongia boito ti mongolio botia maa he palakisaalio. Ualo taa olongia ma’o, Diaoohe ti mongoli, asali ti mongoli molo’ia lo’u banali. Wonu molo’ia lo’u banali ti mongoli salaamati.” Lapata’o taa olongia botia maa longahu mola danggulio to talu lo taa wopatota he palakisaalio boito. Iloontonga li mongolio tihu-tihuto bola meela tunuli’ita lo taa olongia boito. Maa laato losujudulo ti mongolio wau maa he mohile aambungu, sababu otutuulio tutu diduulu u mowali lo’ia li mongolio momatataa huhutu li mongolio.

Taa olongia lohintu, “Woloolo mola wunggulilio sambe ti mongoli maa ma’o lohama hulawa lo wutatu’u boito?” Maa lolo’ia taa ngota to woolota lo taa wopatota boito, “Amiaatia to walungo bele. Lo’odungohee taa motolodile hi bisalawa momeedi to taa olongia. Wau maa yilunggulilio mola bisala u ilodungohe li mongolio boito.

Lo’odungohe’o lo’ia lo taa motota’oa boito maa bolo po’o-po’ooyo taa motolidile bioto, wolo wohe wau woliti mongolio to taa olongia de u leeto wau hutodu hale li mongolio.

Bolo ualo taa olongia ma’o, “Wau diila moingo li mongoli, dabo hulawa li mongoli boito maa tayadu’u duluo, u ngotayadu wohi’u oli mongolio wopatota, sababu wonu dia ti mongolio ma yilate wa’u. Wau diila mongolaa oli mongoli, bo pohilee’u mowali pongaajari oli mongoli u maa yilowali dulahee botia.”

Bo odito wungguli lo taa mohutataa boito.

                        Infroman: L. Kadir, 55 tahun dari Kp.Buhe-Suwawa.